2. júlí 2002

Mál nr. 1/2002
Jónas Jónasson

gegn

Valgarði Ingibergssyni

Mál þetta dæma aðalmennirnir Helgi Áss Grétarsson, Gunnar Björnsson og varamaðurinn Þráinn Guðmundsson sem tók sæti Ríkharðs Sveinssonar.

Með kæru dagsettri 16. október 2001 krafðist sóknaraðili að úrslit í skák hans og varnaraðila í Haustmóti Taflfélags Reykjavíkur 2001 yrðu breytt úr jafntefli í vinning fyrir sig.

Í skák aðila málsins kom upp hróksendatafl þar sem sóknaraðili hafði kóng, hrók og peð gegn kóngi og hróki andstæðingsins. Varnaraðili var naumari á tíma en sóknaraðili og krafðist í tvígang jafnteflis en kröfum hans var í báðum tilvikum hafnað. Að lokum féll hann á tíma í stöðu sem var fræðilegt jafntefli en vinningur var skráður á sóknaraðila. Tveim dögum síðar breyttu skákstjórar mótsins úrslitunum í jafntefli. Skákstjórar og málsaðilar féllust síðar á að skákin skyldi endurtekin. Varnaraðili féll frá þeirri tilhögun á síðustu stundu og ákváðu skákstjórarnir að jafnteflið skyldi standa. Krafa sóknaraðila er að endanlegur dómur skákstjóra verði hnekkt og honum dæmdur sigur í skákinni.

Á þeim tíma sem málsatvik áttu sér stað höfðu engar reglur verið settar um valdsvið dómstóls S.Í., en slíkt braut í bága við 3. mgr. 13. gr. laga S.Í. Engar reglur voru til um kærufresti né heldur hvort hann gæti tekið afstöðu til ákvarðana skákstjóra í einstökum skákum eftir að skákmóti væri lokið. Eðli málsins samkvæmt er brýnt að ef snúa eigi við úrskurði skákstjóra þá skuli það gert við fyrsta tækifæri og á meðan skákmóti stendur. Að sjálfsögðu er hægt að kæra úrskurð skákstjóra í síðustu umferð en þá ber að taka afstöðu til kærunnar innan sólarhrings frá því að kæra barst, sbr. nú 1.mgr. 4.gr. reglugerðar fyrir dómstól S.Í. Fyrirkomulag þar sem marga daga, vikur eða jafnvel mánuði tekur að dæma í málum er varða ákvarðanir skákstjóra í einstökum skákum myndi leiða til öngþveitis þar sem þá gæti dómstóll breytt úrslitum móta löngu eftir að þeim lýkur. Í þessu tilviki eru nú liðnir 8 mánuðir frá því að kæra barst dómstólnum og jafnlangur tími síðan umræddu móti lauk. Sökum þessa verður að telja að dómstóllinn sé þess ekki bær að taka efnislega afstöðu til málsins. Málinu er vísað frá.

Kærandi er beðinn velvirðingar á þeim drætti sem varð á uppsögu málsins. Ekki verður séð af gögnum málsins að við hann sé að sakast að málið hafi ekki verið tekið fyrir fyrr.

Dómsniðurstaða:

Málinu er vísað frá.