20. febrúar 2003

Mál nr. 1/2003
Taflfélag Garðabæjar

gegn

Skákfélaginu Hróknum

Mál þetta dæma aðalmaðurinn Ríkharður Sveinsson og varamennirnir Ólafur H. Ólafsson og Björgvin Jónsson. Með kæru til Dómstóls S.Í., dagsettri 27. janúar s.l. áfrýjar sóknaraðili úrskurði skákstjóra Íslandsmóts skákfélaga þann sama dag, þar sem hann vísar frá kæru sóknaraðila Taflfélags Garðabæjar á hendur varnaraðila Skákfélaginu Hróknum.

I. I.

Kæra sóknaraðila var send skákstjóra Íslandsmóts Skákfélaga, Ólafi Ásgrímssyni, þann 18. október 2002. Varðar kæran efnislega að varnaraðili hafi í 2. umferð Íslandsmóts Skákfélaga 2002-2003 látið Ingvar Jóhannsson, er skráður var 3. borðs maður í b-sveit varnaraðila, tefla á 8. borði í a- sveit félagsins og um leið fært hann upp fyrir bæði 1. og 2. borðs mann í b- sveitinni, sem í sömu umferð tefldu fyrir b- sveit varnaraðila. Telur sóknaraðili þetta brjóta gegn 5. gr. reglugerðar Skáksambands Íslands um Íslandsmót skákfélaga.

II. II.

Kæru sóknaraðila, dags. 18. október 2002, var réttilega beint til skákstjóra Íslandsmóts Skákfélaga, er skv. 18. gr. skáklaga Skáksambands Íslands sker úr um lögmæti keppenda og úrskurðar um önnur þau vafaatriði er upp koma við framkvæmd Íslandsmóts Skákfélaga. Því bar skákstjóra að taka efnislega afstöðu til kærunnar í úrskurði sínum en ekki vísa henni frá. Samkvæmt þessu verður hinn kærði úrskurður því úr gildi felldur og lagt fyrir skákstjóra að taka efnislega afstöðu til kærunnar í nýjum úrskurði.

Úrskurðarorð:
Hinn kærði úrskurður er felldur úr gildi.

Lagt er fyrir skákstjóra Íslandsmóts skákfélaga 2002-2003 að úrskurða að nýju um kæru sóknaraðila, Taflfélags Garðabæjar, á hendur varnaraðila, Skákfélaginu Hróknum, dags. 18. október 2002, þar sem tekin verði efnisleg afstaða til hennar.