17. desember 2002

Mál nr. 2/2002
Taflfélag Garðabæjar

gegn

Skákfélaginu Hróknum

Mál þetta dæma aðalmennirnir Helgi Áss Grétarsson, Gunnar Björnsson og Ríkharður Sveinsson. Með kæru dagsettri 28. nóvember 2002 krafðist sóknaraðili að varnaraðili myndi sæta viðurlögum að mati dómsins skv. 13.gr. laga Skáksambands Íslands fyrir að hafa hætt þátttöku í bikarkeppni sóknaraðila og Íslenskra aðalverktaka (ÍAV).

I.

Hinn 18. október sl. kærði sóknaraðili varnaraðila til skákstjóra Íslandsmóts skákfélaga fyrir að hafa stillt upp ólöglegu liði í þeirri keppni. 28.október dróg varnaraðili sig út úr bikarkeppni sóknaraðila og ÍAV. Sú ákvörðun var rökstudd svo að varnaraðili taldi kæruna tilefnislausa og sýna ,,afgerandi afstöðu sóknaraðila til sín’’. Sóknaraðili taldi skýringarnar ekki gildar og lagði fram kæru vegna þessa 28. nóvember sl.

II.

Í 13. gr. laga Skáksambands Íslands er kveðið á um, að framkoma sem sé andstæð almennu velsæmi og sönnum íþróttaanda, geti varðað viðurlögum sem Dómstóll S.Í. sé einn bær um að ákveða. Að hætta í skákmóti án gildra skýringa er nefnt sem dæmi um slíka framkomu.

Málið veltur á hvort skýring varnaraðili sé gild eður ei. Telja verður að svo hafi ekki verið. Þótt sóknaraðili hafi neytt lögmæltra úrræða, til að fá skorið úr um hvort varnaraðili hafi haft ólöglega keppendur í fyrri hluta Íslandsmóts skákfélaga, veitti það varnaraðila ekki rétt til að hætta þátttöku í skákmóti. Varnaraðili hefur af þessum sökum gerst brotlegur á 13.gr. laga S.Í.

Þetta er fyrsta brot varnaraðila á 13.gr. laga S.Í.. Með hliðsjón af þessu þykir rétt að varnaraðili sé veitt áminning, sbr. 1.ml. 13.gr. laga S.Í..

Dómsorð

Skákfélaginu Hróknum er veitt áminning.