17. desember 2002

Mál nr. 3/2002
Björn Þorfinnsson

gegn

Halldóri Pálssyni

Mál þetta dæma aðalmennirnir: Helgi Áss Grétarsson, Gunnar Björnsson og Ríkharður Sveinsson. Með kæru dagsettri 8. desember 2002 krafðist sóknaraðili að úrslit í skák hans og varnaraðila í afmælismóti Taflfélags Snæfellsbæjar, sem fram fór 7. desember, yrðu breytt úr jafntefli í vinning fyrir sig.

I.

Atvik málsins eru þau að í síðustu umferð mótsins, en þá var tefld atskák, hafði varnaraðili yfirburðartafl en tími hans var af skornum skammti. Eins og fram kemur í kæru sóknaraðila ákvað hann að tefla upp á tímaskort andstæðingsins og hafnaði m.a. jafnteflisboði varnaraðila. Töluverður vandræðagangur var með klukkuna, sem keppendur notuðust við, og varð að útvega nýja klukku. Þá var ákveðið að varnaraðili

ætti 8 sekúndur eftir en sóknaraðili hafði nægan tíma eftir. Þegar varnaraðili átti eina sekúndu eftir krafðist hann jafnteflis en án þess að stöðva skákklukkuna. Í sömu mund og jafntefliskrafan var sett fram féll varnaraðili á tíma og krafðist þá sóknaraðili vinnings. Eftir að hafa frestað ákvörðun dæmdi skákstjóri skákina jafntefli en í lokastöðunni hafði sóknaraðili a-peð gegn a- og b- peðum varnaraðila.

II.

Skv. 13.gr. laga S.Í. skal stjórn S.Í. setja reglur um valdssvið dómstólsins í samráði við hann og hefur það verið gert. Í reglugerðinni er kveðið á um lögsögu dómstólsins og kemur þar m.a. fram að eingöngu er hægt skjóta úrskurðum skákstjóra til dómstólsins þegar um er að ræða mót sem reiknuð eru til alþjóðlegra skákstiga, sbr. 2.mgr. 1.gr. reglugerðarinnar. Þetta reglugerðarákvæði gengur í berhögg við 2. gr. skáklaga S.Í. en sú grein á hinsvegar einungis við um mót sem haldin eru á vegum Skáksambands Íslands. Mótið, sem skákin fór fram í, var ekki reiknað til alþjóðlegra skákstiga og var ekki á vegum S.Í. Óhjákvæmilegt er því að vísa kærunni frá, sbr. 2.mgr. 1.gr. reglugerðar um Dómstól Skáksambands Íslands.

Dómsorð:

Kærunni er vísað frá.