Skáklög Skáksambands Íslands

1. kafli

Skákreglur og skákstjórn

1. grein.

Skákreglur Alþjóðaskáksambandsins (FIDE) gilda í sérhverri skákkeppni á vegum Skáksambands Íslands og félaga innan þess, nema annað sé sérstaklega auglýst.

2. grein.

Fyrir hverja skákkeppni, sem Skáksambandsstjórnin sér um framkvæmd á, skal skipaður skákstjóri sem annast stjórn keppninnar og úrskurðar deiluatriði. Úrskurður skákstjóra er endanlegur, nema um túlkun á skákreglum FIDE eða ákvæðum þessara laga sé að ræða, en þá getur deiluaðili áfrýjað til Dómstóls S.Í., sem þá hefur endanlegt úrskurðarvald. Ef áfrýjunarnefnd er í móti, kemur hún í stað dómstólsins.

2. kafli

Skákþing Íslands

3. grein.

Skákþing Íslands skal haldið ár hvert. Stjórn Skáksambands Íslands sér um framkvæmd þess. Keppt skal í eftirtöldum flokkum:

a) Landsliðsflokki.

b) Áskorendaflokki, flokki undir 2000 skákstigum og flokki undir 1600 skákstigum.

c) Unglingaflokki.

d) Kvennaflokki.

e) Drengja- og telpnaflokki.

f) Barnaflokki.

Skáksambandsstjórn er heimilt að sameina áskorendaflokk og unglingaflokk, og skal þá sá, sem efstur er þeirra, sem ella hefðu keppt í unglingaflokki hljóta þann titil og umbun, sem sigurvegari í unglingaflokki hefði ella hlotið.

S.Í. skal einnig gangast fyrir Hraðskákmóti Íslands og Atskákmóti Íslands. Stjórnin ákveður hverju sinni þátttökugjöld og verðlaun.

Þátttökuréttur á Skákþingi Íslands er ekki skilyrtur við íslenskan ríkisborgararétt. Íslandsmeistaratign getur sá einn borið sem hefur heimild til að vera fulltrúi Íslands í öllum alþjóðlegum mótum.

4. grein.

Landsliðsflokkur

Eftirtaldir keppendur hafa þátttökurétt í landsliðsflokki:

1. Þrír efstu menn í landsliðsflokki á síðasta Skákþingi Íslands, og einn til vara.

2. Fjórir efstu menn í áskorendaflokki á síðasta Skákþingi Íslands.

3. Þrír stigahæstu menn landsins aðrir en þeir, sem falla undir lið 1. eða 2, og tveir næstu til vara

4. Aðrir keppendur valdir af stjórn Skáksambands Íslands.

Skáksambandsstjórn skal a.m.k. tveim mánuðum áður en keppni í landsliðsflokki hefst, tilkynna hversu margir keppendur verða og hvar keppnin verður haldin. Jafnframt skal tilkynna hvaða menn hafi rétt til þátttöku skv. tl. 1-3 og gefa þeim hálfsmánaðar frest til að ákveða hvort þeir tefli. Mánuði áður en keppnin hefst skal Skáksambandsstjórn hafa valið þá sem hún býður til þátttöku.

Bráðabirgðaákvæði:

Á árinu 2002 skal teflt á Skákþingi Íslands í samræmi við eldri skáklög. Stjórn S.Í. er falið að velja keppendur í landsliðsflokk árið 2003 í stað þeirra sem ella hefðu unnið sér þar rétt með árangri sínum í áskorendaflokki í það skiptið, sé slíkt nauðsynlegt.

5. grein.

Efsti maður í hverjum flokki hlýtur nafnbótina Skákmeistari Íslands (í viðkomandi flokki).

Verði tveir keppendur efstir og jafnir, skulu þeir tefla fjögurra skáka einvígi um titilinn Skákmeistari Íslands. Verði þeir enn jafnir, skulu þeir tefla áfram, og hlýtur sá titilinn, sem fyrr vinnur skák.

Verði fleiri en tveir keppendur efstir og jafnir, skulu þeir tefla til úrslita með tvöfaldri umferð. Ef tveir keppendur verða efstir og jafnir eftir þá keppni, skulu þeir tefla áfram, og hlýtur sá titilinn, sem fyrr vinnur skák. Ef fleiri en tveir verða jafnir eftir þessa aukakeppni, skulu þeir tefla einfalda umferð til úrslita, og síðan áfram, ef einhverjir verða jafnir.

Í öðrum flokkum en landsliðsflokki skal einnig gilda sú regla að ef tveir eða fleiri keppendur verða jafnir að vinningum í þeim sætum, sem veita meistaratitil, sæti í landsliðsflokki, eða önnur mikilvæg réttindi, þá skal fara fram sérstök aukakeppni milli þeirra. Fyrirkomulag slíkrar keppni skal ákveðið af Skáksambandsstjórn hverju sinni.

6. grein.

Áskorendaflokkur

Í áskorendaflokki skulu tefldar níu umferðir eftir monrad eða svissnesku kerfi. Flokkurinn skal opinn öllum, sem ekki hafa unnið sér rétt til þátttöku í landsliðsflokki. Ef þátttakendur eru færri en 20 má fækka umferðum. Skáksambandsstjórn skal með a.m.k. tveggja mánaða fyrirvara tilkynna hvar og hvenær flokkurinn fari fram.

7. grein.

Kvennaflokkur

Tólf stigahæstu konur (með skákstig eigi eldri en tveggja ára), skulu mynda landsliðsflokk kvenna á Skákþingi Íslands. Forfallist einhver þessara tólf, er stjórn S.Í. heimilt að velja aðra keppendur til að fylla töluna. Keppni í kvennaflokki skal vera lokið eigi síðar en 30. nóvember ár hvert.

8. grein.

Unglinga- og barnaflokkar

Keppni í unglingaflokki fer fram að hausti og eiga þátttökurétt unglingar sem verða 20 ára á almanaksárinu og yngri. Í drengja- og telpnaflokki keppa drengir og stúlkur sem verða 15 ára á almanaksárinu og yngri. Í barnaflokki eru börn sem verða 11 ára á almanaksárinu og yngri. Keppni í þessum flokkum skal vera lokið eigi síðar en 30. nóvember ár hvert.

9. grein.

Ef vafi leikur á um rétt keppenda til þátttöku í einstökum flokkum, sker skáksambandsstjórn úr því. Dómstóll S.Í. úrskurðar um allan ágreining, sem upp kann að koma varðandi túlkun þessara skáklaga.

10. grein.

Hraðskákmót Íslands

skal háð á tímabilinu mars-júní ár hvert. Stjórn S.Í. ákveður nánari tímasetningu hverju sinni og sér um framkvæmd mótsins. Efsti maður á mótinu hlýtur nafnbótina Hraðskákmeistari Íslands.

11. grein.

Atskákmót Íslands

skal háð í byrjun hvers árs og vera lokið eigi síðar en 28. febrúar. Mótið skal haldið í tveimur þrepum, undanrásum og úrslitakeppni. 16 skákmenn skulu tefla til úrslita með útsláttarfyrirkomulagi. Skáksamband Íslands setur reglugerð um val keppenda, tímasetningu og um annað viðkomandi mótshaldinu.

12. grein.

Umhugsunartími.

Í landsliðsflokki skulu fyrstu tímamörk samsvara að lágmarki viðurkenndum kappskáktímamörkum.. Á Hraðskákmóti Íslands skal umhugsunartími vera 5 mínútur á hvorn keppanda og á Atskákmóti Íslands 25 eða 30 mínútur á hvorn keppanda. Stjórn S.Í. ákveður umhugsunartíma í öðrum flokkum á Skákþingi Íslands.

13. grein.

Stjórn Skáksambands Íslands lætur reikna a.m.k. tvisvar á ári skákstig fyrir íslenska skákmenn, sem þátt taka í skákmótum á vegum sambandsins eða aðildarfélaga þess. Stjórn Skáksambandsins setur nánari reglur um hvaða skilyrði skákmót þurfa að uppfylla til að vera tekin til útreiknings.

Til þess að öðlast rétt til keppni skv. stigum í landsliðsflokki, sbr. 4. gr, skal keppandi hafa teflt a.m.k. 15 kappskákir næstliðin tvö ár, sem teknar hafa verið til stigaútreiknings.

14. grein.

Stjórn Skáksambands Íslands annast val landsliðs Íslands í skák, (karla-, kvenna- og unglinga-landslið), hverju sinni, svo og þátttakendur Íslands í alþjóðlegum mótum á vegum FIDE.

Við val á keppendum og skipan í landsliðssæti skal stjórnin hafa til hliðsjónar alþjóðleg skákstig og árangur skákmanna á nýafstöðnum mótum, enda hafi þeir teflt eigi færri en 30 kappskákir á undan-förnum 24 mánuðum. Stjórn S.Í. hefur heimild til að falla frá þessum mörkum við mjög sérstakar aðstæður.

Þó skal Skákmeistari Íslands ávallt eiga sæti í landsliði Íslands og rétt til að tefla fyrir Íslands hönd á svæðismóti FIDE.

Stjórn S.Í. getur falið sérstakri nefnd eða þjálfara að gera tillögu til hennar um skipan landsliðs.

3. kafli

Íslandsmót skákfélaga

15. grein.

Stjórn Skáksambands Íslands gengst árlega fyrir Íslandsmóti skákfélaga. Keppnin er sveitakeppni og eiga öll skuldlaus taflfélög eða svæðasambönd innan S.Í þátttökurétt. Stjórn S.Í. skal ákveða keppnisdaga og þátttökugjöld fyrir 1. september ár hvert.

16.grein.

Keppninni skal skipt í fjórar deildir. Efsta sveit í 1. deild er sigurvegari keppninnar.

Fjöldi vinninga skal ráða úrslitum um endanlega röð sveita. Verði vinningar jafnir, skulu liðsstig (matchpoints) ráða. Hvert félag á rétt á að senda svo margar sveitir til keppninnar sem það óskar. Þó mega ekki vera fleiri en tvær sveitir frá nokkru félagi í fyrstu deild og ekki fleiri en fjórar samanlagt í fyrstu og annarri deild. Þó er félögum sem hafa með sér svæðissamband, heimilt að sameinast um eina eða fleiri sveitir.

17. grein.

8 lið skulu vera í tveim efstu deildunum. Stjórn S.Í. hefur rétt til að fjölga eða fækka liðum í 3. og 4. deild þyki henni ástæða til. Efsta lið í annarri og þriðju deild færist upp í lok hvers keppnistímabils en neðsta lið fyrstu, og annarrar deildar færist niður. Tvo efstu lið 4. deildar færast upp í lok hvers keppnistímabils en tvo neðstu lið 3. deildar færast niður.

18.grein.

Tilkynning skákmanns skv. 12.gr. laga S.Í. skal hafa verið send 20 dögum fyrir mótið ella getur hann ekki teflt fyrir sitt nýja félag á því. Félög sem hyggjast taka þátt í Íslandsmóti skákfélaga skulu minnst 14 dögum fyrir keppnina skila félagaskrá til S.Í. Á félagaskrám skulu tilgreind nöfn, heimilisföng og kennitölur félagsmanna. Aðeins þeir sem eru á skránni teljast löglegir með viðkomandi félagi í Íslandsmótinu (fyrri - og seinni hluta). Enginn hefir rétt til að tefla fyrir nema eitt félag, sjá þó ákv. 16. greinar um svæðissambönd. Sé sami maður á félagaskrá tveggja eða fleiri félaga skal mótsstjórn strika hann út af báðum eða öllum félagaskrám þar til leiðrétting fæst. Fáist ekki leiðrétting viku fyrir keppnina telst skákmaðurinn ekki löglegur með neinu félagi.

19. grein.

Keppendur skulu vera fullgildir félagsmenn þeirra taflfélaga sem þeir tefla fyrir. Skákmanni, sem teflt hefur í neðri deild, er hvenær sem er heimilt í sömu keppni að tefla í efri deildum fyrir félag sitt. Skákmanni er óheimilt að tefla í neðri deild hafi hann áður í sömu keppni teflt í efri deild. Innan sömu sveitar skal borðaröð haldast óbreytt. Komi lið ekki til keppni án orsaka tapar það skákum á öllum borðum. Komi slíkt fyrir tvisvar skal liðið dæmt úr keppninni. Í hverri viðureign skal a.m.k. helmingur liðsmanna hverrar sveitar vera íslenskir ríkisborgarar eða hafa verið með lögheimili sitt á Íslandi undanfarið ár.

20.grein.

Stjórn Skáksambandsins skal árlega skipa sérstaka mótsstjórn, sem sér um framkvæmd mótsins og sker úr um lögmæti keppenda. Taki ólöglegur keppandi þátt í keppninni skal mótsstjórn úrskurða skák hans tapaða án kröfu. Úrskurðurinn skal falla innan tveggja sólarhringa frá upphafi þeirrar umferðar sem keppandinn tók þátt í. Úrskurði mótsstjórnar er hægt að skjóta til Dómstóls S.Í. svo og einnig ef mótsstjórn hafi látið undir höfuð leggjast að dæma skák ólöglegs keppanda tapaða. Slík erindi eiga að hafa borist dómstólnum eigi síðar en fjórum sólarhringum frá upphafi þeirrar umferðar sem keppandinn var á meðal þátttakenda. Dómur Dómstóls S.Í. skal liggja fyrir eigi síðar en 5 sólarhringum eftir að erindið barst. Skákstjóri úrskurðar um önnur vafaatriði.

21.grein

Stjórn S.Í. setur reglugerð um nánari framkvæmd Íslandsmóts skákfélaga.